السلام عليكم ورحمة الله
كلكم كتعرفو الشهدة او خلية النحل
وكلكم عارفين عجينة 10 دقائق او العجينة السحرية هادا تطبيقي المتواضع للشهدة درتها ثباح العيد الكبير وبلا متضحكو عليا نسيت الملح وجات مسوسة ولكن قطعتها بحال الطوست ودوزت الطريفات فالبيض وقليتهم حا حاجة مضيع هههه انحتاجو فالمرحلة الاولى
2 كيسان دقيق,3 معالق نيدو كيخلليها طرية ,معلقة لخميرة,2 كيسان الما دافي,2 معالق سنيدة
المرحلة التانية:
نص كاس زيت,3كيسان دقيق
*****************
فمولينيكس كنخلطو مقادير المرحلة الاولى ونخلوهم اخمرو فشي اناء ونغطوهم عشرة دقايق من بعد نزيدو الزيت والدقيق ونبداو نجمعو فالعجينة بشويا اتبدا تلصق فايدنا غنديرو لهم زيت ولا نرشوهم بالدقيق ونبقاو ندلكو حتا تولي لينة وقد ما تدلكات كتجي زوينة
من بعد كاين اللي كيخلليها تخمر عاد اشكلها انا كنخلليها ترتاح شويا ونبدا نشكلها
كاين اللي كيسرحها وقطعها دراور صغار انا كنقسمها كويرات نيشان عاد وكنضغط بصبعي وسطها ونعمرها باش بغيت ونسدها المول مدهون ومرشوش بالدقيق ونبدا نحط الكويرات وحدة حدا التانية ونخلليها تخمر مزيان حتا تطلع. وتنفخ ندهنها باصفر البيض معاه شوية نيسكافيه محلولين بالحليب ونرش الزنجلان من لفوق وندخلها لفرن سخون حتا طيب وتحمر من لفوق. هادي عمرتها بالشكلاط ومرات كندير فروماج مودزريلا ولا كندير كيري عمروها باللي حبيتو وما ديرو بحالي وتنساو الملح;)
تحياتي ام جنات
Posts
0 comments:
Post a Comment