ميني بيتزا بالطون

السلام عليكم ورحمة الله
هادو ميني بيتزا بالطون كيجو لداد
نبداو على بركة الله بالنسبة لمقادير العجين
         رابعة دقيق
           قبصة لملح
   معلقة صغيرة خميرة عادية
       الزعتر محكوك
       نص كاس زيت لعود
               الماء دافي

بالنسبة الصوص
          مطيشة محكوكة
                الملح
               الابزار
                الزعتر
                الكامون
          التومة مهروسة
     جوج معالق مطيشة لحك
             معلقة دقيق
          حك ديال الطون
               الربيع مقطع
          الزيتون مقطع دواور
            فروماج محكوك
                **********************
                 الطريقة
العجينة نجوفو الدقيق ندير وسطه لخميرة لملح ونرش الزعتر نخوي الزيت ونبدا نجمع العجين وانا كنزيد فالما حتا تجمع لعجينة تكون مرخوفة نعملها كورة ونحطها فشي بواطة نفلحها من لوسط بموس على شكل+ ونخوي فيها شوية الزيت ونغطيها نخلليها تخمر ساعة تقريبا

الصوص فمقلة ندير زيت الرومية وشوية البلدية نخوي مطيشة ونزيدها لملح والابزار ومطيشة لحك والكامون والزعتر والتومة شوية الربيع ونخللي الباقي للتزيين نزيد شوية ديال لما ونخليها تطيب من بعد نرش الدقيق بصفاية ونحرك ونخلليها تعقاد مللي طيب نحطها على جنب تبرد

فهاد الوقت العجينة خمرات ناخدها ندلكها دلكة خفيفة نسرحها فبلاصة مرشوشة بالدقيق وناخد قطاعة اما مربعة او مدورة حسب الرغبة ونقطعها دواور ونستفهم فلاطة لفران نتقبهم بالفورشيط وندخلهم لفران سخون اطيبو نص طيبة
نخرجهم وندهنهم بلاصوص نرش شوية لفروماج ندير الزيتون والطون ونرش بالربيع ونرش مرة تانية لفروماج ونرجعهم اطيبو ودوب لفروماج
كنتمنى اعجبوكم وقبلو عليا راني ما زال مبتدئة;)
تحياتي ام جنات
    

منشورة في: مدونة ام جنات